मेडिकल माफियासँग सचेत रहन डा. केसीको सुझाव सहित देउवा सरकारलाई पाँचबुँदे माग

‘नेपालमा मेडिकल माफियाहरूले सत्ता फेरिएसँगै नयाँ सरकारलाई आफ्नो प्रलोभनमा पार्ने गरेका छन् । अहिलेको सत्तारुढ दलनिकट माफियाहरूको चलखेल पछिल्लो समय बढेको छ । देशका धेरै निजी मेडिकल कलेजहरूलाई मुठ्ठीभर आपराधिक पृष्ठभुमिका माफियाहरूले लिने क्रम चलिरहेको छ,’ उनले भनेका छन्, ‘गत चुनावमा उनीहरूमध्ये केहीले मुख्य पार्टीहरूका तर्फबाट चुनावमा टिकट समेत पाएका थिए । नयाँ सरकारलाई हामी प्रष्ट भाषामा चेतावनी दिन चाहन्छौंः अपराधी र माफियाहरूको कुनै राजनीतिक दल वा विचार हुँदैन । उनीहरू जोसुकैको नजिक भए पनि दण्डित हुनुपर्छ ।’

डा. केसीले मेडिकल माफियाहरूसँग खर्च लिएर पार्टी चुनाव लड्ने हो भने देशको स्वास्थ्य र मेडिकल शिक्षा त कहिल्यै उँभो नलाग्ने पनि बताएका छन् । उनले मेडिकल माफियाको चंगुलमा फस्दा भ्रष्टीकरण र अपराधीकरण झनै मौलाएर जाने पनि चेतावनी दिएका छन् ।

पाँचबुँदे माग अघि सार्दै डा. केसीले आफूसँग सरकारले पटक–पटक गरेका सम्झौता पनि कार्यान्वयन गर्न भनेका छन् । उनले चिकित्सा शिक्षा ऐनको सम्झौताको संशोधन गर्दा आयोगका अध्यक्षपाँ प्रधानमन्त्री तथा सहअध्यक्ष शिक्षा र स्वास्थ्यमन्त्री हुने व्यवस्था हटाएर कार्यकारी उपाध्यक्षलाई नै अध्यक्षताको जिम्मेवारी दिने व्यवस्था गर्न पनि माग गरेका छन् ।

डा. केसीले कोभिड महामारीको दोस्रो लहर अझै पूर्ण रुपमा नसकिएको तथा तेस्रो लहरको जोखिम कायमै रहेकाले परीक्षण, भ्याक्सिन वितरण र उपचारको पर्याप्त व्यवस्था गर्न सरकासँग माग गरेका छन् ।

डा. केसीले बीपी कोइराला स्वास्थ्य विज्ञान प्रतिष्ठान धरानमा हाल चलिरहेको आन्दोलनका सबै मागहरू पूरा गरेर संस्था सुधारलाई अघि बढाउनु पनि माग गरेका छन् । ‘जालसाजी र भ्रष्टाचार प्रमाणित भएका पदाधिकारीहरूलाई तत्काल पदमुक्त गरिनुपर्छ । त्यसपछि बीपी प्रतिष्ठान लगायत कुनै पनि विश्वविद्यालय र प्रतिष्ठानमा पदाधिकारी नियुक्त गर्दा निष्पक्ष रुपमा पदाधिकारी मापदण्ड निर्धारण कार्यदलको सिफारिस अनुसार नयाँ पदाधिकारी नियुक्त गर्नुपर्छ । त्यसका लागि तत्काल कानुनी व्यवस्था गर्नुपर्छ,’ उनले भनेका छन् ।
डा. केसीले पूर्ववर्ती सरकारको संरक्षणमा रहेर चिकित्सा शिक्षा आयोगका पदाधिकारीहरूलाई धम्क्याउने, नाजायज हस्तक्षेप गर्न खोज्ने तथा भौतिक आक्रमणको धम्की दिने व्यक्तिलाई कारबाही गर्न पनि माग गरेका छन् ।