काठमाडौं उपत्यकाभित्र सार्वजनिक तथा निजी सवारी साधन पूर्णरुपमा चलाउन पाईने

उपत्यकाका तीनै जिल्लाका प्रमुख जिल्ला अधिकारीहरुको बैठकले उपत्यकाभित्र चल्ने सार्वजनिक तथा निजी सवारी साधनमा जोर–बिजोर प्रणाली हटाउँदै निषेधाज्ञालाई जारी राख्ने निर्णय गरेको हो ।

आगामी मंगलबारदेखि असार ३१ गतेसम्म निषेधाज्ञा जारी गरिएको छ । सार्वजनिक यातायातमा साना सवारीलाई पनि खुला गरिएको छ । यस अघि २५ सिट क्षमताभन्दा माथिका सवारीलाई मात्रै जोर बिजोर प्रणालीमा चलाउन दिइएको थियो ।

अब सफा टेम्पो र निलो माइक्रो पनि सिट क्षमता भन्दा बढी यात्रु राख्न नपाउने गरी सञ्चालन गर्न पाइने भएको हो । मास्कलगायत स्वास्थ्यका मापदण्ड अनिवार्य रूपमा पालना गर्नुपर्ने जनाइएको छ ।

यसका साथै पूर्वनिर्धारित परीक्षाहरू पनि सञ्चालन गर्न पाइने भएको छ । परीक्षा हलमा २५ जना मात्रै विद्यार्थी राखेर परीक्षा सञ्चालन गर्नुपर्ने जनाइएको छ ।

जिल्ला प्रशासन कार्यालयको अनुमति लिएर काठमाडौं उपत्यकाभित्र प्रवेश गर्न पनि दिइने भएको छ । सभा सम्मेलन, सिनेमा हल, पार्टी प्यालेस, डान्सबार, दोहोरी, नाचघर, क्लब लगायत मानिसको भीडभाड हुने सबै स्थल तथा कार्यक्रमहरु भने निषेधाज्ञाभर बन्दनै हुने भएका छन् ।

WRITE COMMENTS FOR THIS ARTICLE